Wala ginpasugtan ni Mayor Raisa Treñas ang hingyo sang Department of Public Works and Highways – Iloilo City District Engineering Office (ICDEO) nga extension nga tubtub sa Mayo 2027 agud nga makumpleto ang ginatukod nga flood mitigation structures sa Barangay Alalasan, Lapuz, Iloilo City.
Suno kay Joy Fantilaga-Gorzal, ang spokesperson sang alkalde, ginhatagan lamang ni Mayor Treñas sang tubtub sa Marso 2027 ang talatapan agud nga makumpleto ang bug-os nga stretch sang proyekto lakip na ang porsyon tubtub sa Barangay Divinagracia, La Paz.
Ini matapos ginplastar sang ICDEO nga sa Pebrero 2027 ang ila nga revised completion date sa amo nga project.
Kabahin ini sang naistoryahan sang ginsapol sang alkalde ang District Engineer, Assistant District Engineer, kag iban pa nga mga opisyal sang ICDEO agud hambalan ang amo nga proyekto nga ginareklamo sang mga pumuluyo kag mga motorista.
Agud nga malab-ot ang deadline, ginpalab-ot sang alkalde nga kinahanglan mag-deploy ang ICDEO sang dugang nga manpower agud nga padasigon ang ila nga trabaho.
Magluwas diri, gin-require man ang ICDEO nga magpasa sang progress reports sa kada duha ka semana sa baylo nga magpahibalo lamang sang status sang project kun magpangayo naman sila sang extension.
Ginpahanumdom man sang alkalde ang istrikto nga pagsunod sa safety measures sa construction site para sa mga residente kag motorista nga nagalabay sa lugar.
Suno kay Gorzal, bangud sa delay sa proyekto, may pila pa ka mga drainage projects ang Iloilo City Government nga temporaryo man nga on-hold agud nga masigurado ang husto nga pagtabo sang drainage systems sang local kag national government.
Nahibaluan nga sandig sa project report sang ICDEO, gin-aprubahan sang Nobyembre 10, 2026 ang ika-walo nga Contract Time Extension nga naghatag sang dugang nga tion sa contractor agud makompleto ang proyekto.
Base sa project information board, ang proyekto nga may titulo nga “Construction of Flood Mitigation Structures Within Iloilo City” may contract cost nga ₱102,798,574.13 kag ginpatuman sang F. Gurrea Construction, Inc.
Nag-umpisa ang proyekto sang Pebrero 20, 2025 kag natalana kuntani nga matapos sang Enero 8, 2026, sa idalom sang DPWH-ICDEO.
Sa report sang ICDEO, ang gin-cite nga mga rason sa delay amo ang:
* administrative kag regulatory delays samtang ginahulat ang Certificate of Exemption halin sa Commission on Elections (COMELEC) nga nagresulta sa temporaryo nga suspension sang construction halin Abril 11 tubtob Mayo 25, 2025
* ang mga obstruction sa construction site bangud sang nagalabay nga water pipelines, electrical lines kag telecommunication lines.
* ang padayon nga pag-ulan kag indi maayo nga weather conditions sang mid-to-late 2026, nga nagresulta sa lima ka sunod-sunod nga contract time extensions.#
