Ginklaro ni Iloilo 5th District Board Member Rolex Suplico nga wala siya sang plano nga magpadalagan bilang kongresista sa Quinto Distrito sa palaabuton nga eleksyon.
Ini ang sabat ni Suplico matapos ginkwestyon sang Bombo Radyo natuhoy sa reaksyon ni Iloilo 5th District Representative April “Binky” Tupas nga “pamulitika” lang ang privilege speech sang amo nga board member nga nagatukso sang “BIBO” tarpaulins nga “nagalapta” sa ila distrito.
Sabat ni Suplico, malayo pa ang piniliay, kag ang iya ginahimo subong kabahin lamang sang iya trabaho nga magsaway kun ano ang iya makit-an nga sala.
“Daw wala man ko sang plano [nga magpadalagan as Congressman]. Layo pa ang eleksyon. Layo pa. Two years to go pa. In the meantime, indi bala nga serbisyo mo na to call out a congresswoman? Indi man siya perfect. Ngaa Perfecto ngalan ya, indi man,” pahayag sini. “May mga sala man sya. I think sala ini.”
Gin-athag man sini nga kun sa iya may makit-an nga sala, mangayo man siya sang pasaylo.
“Basi kun may sala ako, tawgon man nila ako, then, I will apologize. Wala sang malain dira,” dugang sini.
Sa mga nagabalik naman sa iya sang isyu natuhoy sa paglapas sa Anti-Epal Policy, gin-athag sang board member nga iya kaugalingon nga pondo ang iya ginagamit sa iya programa nga School Supply Distribution initiative.
“Private-funded ina, halin sa bulsa ko na,” sabat sini. “Bulsa ina ni Rolex Suplico, pati sang akon pamilya. Ang sweldo ko gasulod lang da mo, wala na ko gabaton sang sweldo ko.”
Pahayag pa sini, lain ini kun ipaanggid sa proyekto nga asphalt overlay apang may tarpaulin nanday Rep. Tupas kag bana sini nga si former 5th District Rep. Raul “Boboy” Tupas, nga nagagamit sang alyas nga “BIBO.”
“Ang malain pa dira, dira ya ang iya bana eh. Ang bana ya private citizen na. Ngaa gasakay na da ya man? Ano na, conjugal dictatorship na?,” pahayag pa sini. “The last time I checked, ha. Ang 5th district, part pa sang Republika ng Pilipinas. Therefore, ang kasuguan, mga layi, mga regulations para sa bilog nga Pilipinas, ga-apply pa ina sa Quinto Distrito, including ang Anti-Epal Policy sang gobyerno.”#
