Nagpakigsapol ang Office of Civil Defense (OCD) sa mga katapo sang pribado nga sektor sa labing-una nga tion pamaagi sa closed-door meeting agud mahibaluan ang epekto sa ila sang El Niño.
Isa sa mga nagtambong sa meeting amo si Dr. Rogelio M. Florete, ang chairman sang Florete Group of Companies kun sa diin sa idalom man sini ang Bombo Radyo Philippines kag Bombo Radyo Philippines Foundation Incorporated, Flowater Resources Incorporated, QueenBank, R.Florete Pawnshop and Jewelry kag iban pa.
Sa interview sang Bombo Radyo kay Regional Director Raul Fernandez, iya ginpahayag nga ginpresentar na nila ang ila outlook sa El Niño kag kun ano ang sa subong nga sitwasyon.
Nakig-angot sila sa mga private sectors bangud suno sa iya, indi man luwas ang mga ini sa epekto sang El Niño.
Sa subong, ang duha sa mga ginakabalak-an nila amo ang kakulang sang tubig kag ang electric stability.
Pahayag ni Fernandez, ang amo ini nga mga problema nagakinahanglan na sang government intervention, gani, ipresentar nila ang mga nasambit nga problema sa regional El Niño team agud mahatagan sang nagakaangay nga tikang.
Dugang pa ni Fernandez, kun mag-untat ang economic activity, maapektuhan man ang mga pumuluyo.
Ginsiguro niya man nga mapahagan-hagan ang mga nasambit nga masami nga ginakabalak-an sang mga tawo sa subong nga El Niño.
Ginsambit niya man nga ang ini nga tikang isa ka kolaborasyon sa tunga sang government sector kag private sector.
