Nagapanawagan ang League of Municipalities of the Philippines (LMP) – Iloilo Chapter sa Department of Budget and Management (DBM) nga liwat nga repasuhon kag amyendaran ang probisyon sa DBM Budget Circular No. 2026-1 nga nagamando sang 75-percent obligation sang 20-percent Development Fund bilang isa sa mga kondisyon para makabaton sang Collective Negotiation Agreement (CNA) Incentive ang mga kwalipikado nga empleyado sang Local Government Units (LGUs).
Pinaagi sa isa ka position paper, ginpahayag sang LMP-Iloilo ang ila pagpamatok sa amo nga requirement bangud suno sa ila, indi dapat ibase sa obligasyon ukon utilization sang Development Fund ang paghatag sang incentive sa mga empleyado nga mahimo maapektuhan sang mga sitwasyon nga wala na sa direkta nga kontrol sang mga empleyado.
Suno sa LMP-Iloilo, may nagkalain-lain nga rason kun ngaa indi masunod sang pila ka municipal governments ang 75-percent obligation target.
Lakip diri ang failed public bidding, delays sa procurement process, problema sa right-of-way, kakulang sang contractors kag suppliers, regulatory approvals, kag kalamidad kaangay sang pagbaha kag bagyo nga mahimo makaapekto sa implementasyon sang mga development projects.
Ginpunto man sang liga nga ang 20-percent Development Fund kag ang CNA Incentive may yara sang nagkalain-lain nga katuyuan.
Ang Development Fund ginatuyo para sa mga development projects kag programa sang mga LGU, samtang ang CNA Incentive nagakilala sa kontribusyon sang government employees sa productivity, efficiency kag cost-saving measures.
Suno sa position paper, “The two performance dimensions should be assessed independently.”
Dugang pa sang LMP-Iloilo, indi makatarungan nga madula ang incentive sang mga empleyado nga nakatuman sang ila obligasyon kag nakabulig sa pag-improve sang serbisyo publiko bangud lamang sa delays sa procurement kag project implementation.
Ginkwestyon man sang liga ang paggamit sang September 30, 2026 cutoff date, bangud ang DBM Budget Circular No. 2026-1 ginpagwa lamang sang November 4, 2026, apisar ang ginapatuman nga obligation threshold ginabase sa performance sang LGUs antes pa sang pagpagwa sang circular.
Suno sa ila, mahimo ini magresulta sa indi patas nga pagpatuman sang bag-o nga requirement, bangud wala na sang bastante nga tion ang mga LGU nga makapanabat ukon maka-adjust sa bag-o nga kondisyon.
Sa ila primary recommendation, ginapanawagan sang LMP-Iloilo nga kuhaon ukon suspendihon ang 75-percent Development Fund obligation requirement bilang mandatory condition sa paghatag sang FY 2026 CNA Incentive.
Apang kun indi ini pagpaboran sang DBM, nagapanugyan ang liga sang iban pa nga mga alternatibo.
Lakip diri ang pag-extend sang assessment cutoff tubtob December 15, 2026, paghatag sang exemptions sa mga LGU nga may justifiable project delays, pagpatuman sang proportionate ukon conditional eligibility, kag paghatag sang transition period para sa bag-o nga eligibility requirements.
Ginpahayag man sang LMP-Iloilo nga ang ila panawagan wala nagakahulugan nga luyag nila nga maghina ang fiscal accountability sang mga local government units.
Sa baylo, ginapabug-atan nila nga kinahanglan balansehon ang responsible utilization sang public funds kag ang patas nga pagtratar sa mga empleyado sang gobyerno.
“Government employees should be held accountable for the responsibilities entrusted to them, but they should not be deprived of recognition for their accomplishments because of circumstances beyond their control,” suno sa position paper.
Gani, ginapanawagan sang LMP-Iloilo sa DBM nga magpatigayon sang immediate policy review kag konsultasyon upod sa League of Municipalities of the Philippines, Department of the Interior and Local Government (DILG), local government finance and budget officers, kag mga tiglawas sang government employees.
Luyag man sang liga nga magpagwa ang DBM sang paathag ukon amendatory circular antes ang nakatalana nga pag-release sang FY 2026 CNA Incentive sa December 15 tubtob 31, 2026.
Ginpahayag sang LMP-Iloilo nga dapat magpadayon ang accountability kag fiscal discipline sa gobyerno, apang kinahanglan man nga kilalahon kag hatagan sang patas nga pagtratar ang mga public servants nga nagaserbisyo sa ila tagsa ka komunidad.
Ang position paper ginpirmahan ni LMP-Iloilo Provincial President kag Badiangan Mayor Atty. Suzette A. Mamon, upod sa iban nga mga municipal mayors sa probinsya sang Iloilo.
Text by: Bombo Lynd-C Bade
