Padayon nga gina-monitor sang Iloilo City Government ang mga bubon sa siyudad matapos ang pila ka mga reklamo sang pumuluyo, ilabi na sa Barangay Zamora-Melliza, City Proper, angut sa posibilidad sang water contamination sa ila nga mga bubon.
Sa interview sang Bombo Radyo kay Engineer Neil Ravena, head sang General Services Office (GSO), iya ginpahayag nga duha na ka semana nga nagapatigayon sang monitoring ang personnel sang City Environment and Natural Resources Office (CENRO) sa volume kag posible nga contamination sang tubig sa mga shallow wells sa nagkalain-lain nga barangay.
Suno sa iya, wala pa sang significant nga pagnubo sa volume sang tubig kag wala pa naeksperyensyahan ang ginapaabot nga 20 tubtob 30 porsyento nga water supply deficit.
Pahayag pa ni Ravena, nakabulig man ang mga nagligad nga pag-ulan sa pag-recharge sang groundwater sources.
Ginpahayag man niya nga gina-monitor man sang CENRO ang mga report sang water contamination, ilabi na sa mga coastal barangay, agud malikawan ang posible nga negatibo nga epekto sini sa ikaayong lawas sang mga residente.
Ginpakigbahin man sini nga kasunod sa reklamo sang mga pumuluyo sa Barangay Zamora-Melliza, gilayon nga nagpakuha sang water samples ang syudad, amo man sa iban pa nga mga lugar nga may report sang contamination agud mahibaluan kon kinahanglan ini sang chlorination.
Dugang pa ni Ravena, may yara na sang ginlatag nga mga response scenarios ang siyudad para sa posible nga water supply deficit kag ang pag-deploy sang mga kinahanglanon nga kagamitan ang magadepende sa resulta sang monitoring kag aktuwal nga sitwasyon sa mga barangay.














