Pilason ang isa ka utility boy sang Barangay San Pedro, Molo, Iloilo City matapos ginbuno sang isa ka menor de edad pasado alas sais subong nga gab-i, Nobyembre 17.
Ang biktima amo si Wilmar, samtang ang suspek naman ginapahayag nga naga-edad sang 16-anyos.
Sa interview sang Bombo Radyo kay Barangay Kagawad Rhomar Martirez, iya ginpahayag nga samtang naga-istorya siya kag ang isa pa ka barangay kagawad kaupod ang biktima, hinali lang nagdalagan pakadto sa ila ang ginabanta tatlo tubtob apat ka mga pamatan-on.
Gilayon nga ginsumalang sang utility boy ang mga kabataan kag ginpamangkot kun maano sila, apang ginkakibot sang kagawad sang gulpi nag-gabot sang kutsilyo ang nasambit nga menor de edad.
Suno kay Martirez, gintilawan pa sini nga punggan ang menor de edad apang ginlagas gid sini ang biktima nga nagdalagan palayo agud magpalagyo.
Nakaangkon ang biktima sang samad sa likod nga parte sang iya tuo nga butkon.
Gilayon man nga nagresponde ang Iloilo City Emergency Responders agud mabuligan ang biktima.
Arestado naman ang ginatudlo may kahimuan sa amo nga stabbing incident. (via Bombo Ireca Faye Pioquinto)












