Nagpanawagan si former Finance Undersecretary kag University of the Philippines School of Economics Professor Cielo Magno sa gobyerno nga tutukan ang mga ugat sang kapigaduhon kag magpatuman sang mas permanente nga solusyon, sa baylo nga padayon nga magsalig ang mga pumuluyo sa ayuda.
Suno kay Magno kadungan sang pag-abot sini sa Iloilo, importante nga ang bulig pinansyal sang gobyerno mahatag sa mga tawo nga nagakinahanglan gid sini, apang indi dapat mangin amo lamang ini ang nagapanguna nga sabat sa problema sang kapigaduhon.
Ginpahayag sini nga sa baylo nga masolusyunan ang amo nga problema sa nagligad nga mga tuig, nagadugang pa ang pagsalig sang pila ka pumuluyo sa mga programa sang ayuda sang gobyerno.
Dugang pa ni Magno, kinahanglan nga pamangkuton sang gobyerno kun paano mapauswag ang kahimtangan sang mga imol kag mahatagan sila sang oportunidad nga makasarang sa ila kaugalingon, sa baylo nga magsalig lamang sa bulig sang estado.
Kun lantawon ang data sang Philippine Statistics Authority (PSA), naglab-ot sa 9.7 percent ukon kapin 11.08 million ka Pilipino ang naga-eksperyensya sang kapigaduhon bangud kulang ang ila kita para sa nagapanguna nga pagkaon kag iban pa nga kinahanglanon. Ginkwestyon naman sang mga ekonomista ang amo nga data nga mahimo wala sini napakita ang bug-os nga kahimtangan sang ekonomiya, bangud sa poverty threshold nga ginagamit sang PSA nga mas manubo sa aktuwal nga gasto nga kinahanglanon sang isa ka pamilya para mabuhi.#














