Ginakabig ni Presidente Ferdinand Marcos Jr. nga madinalag-on ang pagpanguna sang Pilipinas sa 2026 chairmanship sa nagtakop nga 49th Association of Southeast Asian Nations (ASEAN) Summit.

Suno kay Maros, nangin maayo kag produktibo ang mga diskusyon sang mga lider sang ASEAN sa sulod sang tatlo ka adlaw, nga nagresulta sa mga desisyon nga magahatag sang solusyon sa importante nga mga isyu sa rehiyon.

Pahayag pa niya, nalakip sa mga resulta sang summit ang masobra 100 ka dokumento nga naga-unod sang mga plano, giya kag pamaagi para sa mas masangkad nga kooperasyon sang mga pungsod sa idalom sang tatlo ka ASEAN pillars.

Ginakabig man sang presidente ang ASEAN Digital Economy Framework Agreement (DEFA) bilang isa sa mga highlight sang negosasyon, nga amo ang una nga digital economy framework agreement nga nagalakip sa bilog nga rehiyon.

Ginpakigbahin man niya ang pag-uswag sa plano nga ASEAN Power Grid, lakip ang una nga undersea energy-sharing cable nga magakonektar sa Mindanao kag Sabah, Malaysia.

Ginpabaskog man, suno kay Marcos, ang kooperasyon sang mga pungsod sa maritime security kag disaster response, samtang may pag-uswag sa negosasyon para sa South China Sea Code of Conduct.

Nag-uyon man ang mga lider sa pagpalig-on sang proteksyon sa mga kabataan sa digital environment, pagpakig-away sa online scams, kag pagseguro sang suplay sang enerhiya kag pagkaon sa rehiyon.

Dugang pa ni Marcos, kinahanglan masunod sang konkreto nga tikang ang mga kasugtanan para mabatyagan sang mga pumuluyo ang benepisyo sang mga ini.

Ginpasalamatan man sang Presidente ang mga lider sang ASEAN kag mga partner countries sa ila suporta kag aktibo nga kooperasyon sa mga aktibidad kag diskusyon sa nasambit nga summit.