Gina-classify bilang Micro, Small and Medium Enterprise (MSME) ang Cale88 Foods Corporation nga gina-link kay Atty. Manases Carpio nga bana ni Vice President Sara Duterte.

Ini ang ginpahayag ni Department of Trade and Industry (DTI) Undersecretary Ceferino Rodolfo, isa sa mga testigo sang depensa, sa ika-45 nga adlaw sang impeachment trial batok sa bise presidente subong nga adlaw.

Suno kay Rodolfo, nahulog sa kategorya sang MSME ang Cale88 bangud wala nagalab-ot sa P15 million ang project cost sini.

Ginpahayag man niya nga nag-apply ang korporasyon para sa Certificate of Registration of an Export Enterprise sa Board of Investments (BOI) Extension Office sa Davao kag gin-aprubahan ang aplikasyon sini.

Gin-athag ni Rodolfo nga ginpasimple sang BOI ang proseso sang pag-evaluate kag pag-approve sang mga aplikasyon sang MSME sang 2016, paagi sa paghatag sang awtoridad sa ila mga extension office nga magdesisyon sa mga aplikasyon nga sakop sang ila hurisdiksyon. Suno pa sa iya, wala siya nakakita sa evaluation report sang Cale88 sang bisan ano nga objection ukon pagsupak sa aplikasyon sini.

Ginpahayag man ni Rodolfo nga wala ginakinahanglan nga ipanugyan sa mga newspaper of general circulation ang Certificate of Registration of an Export Enterprise sang Cale88 bangud MSME ini. Sa baylo, ginapaskil lamang sang BOI sa ila website ang pahibalo nahanungod sa amo nga registration.

Ginpaathag naman sang abogado sang depensa nga si Justin Gular nga nagasupak ang testimonya ni Rodolfo sa nauna nga findings sang prosecution witness kag financial forensic expert nga si Alex Cabrera, nga nagakwestyon sa real functioning business nga Cale88. Ginpanginwala man sang depensa ang alegasyon nga nakabaton sang kwarta si Carpio halin sa amo nga korporasyon.

Madumduman nga nagtestigo si Cabrera nga may yara sang unexplained wealth nga nagabalor sa P817 million tubtob P1.5 billion ang mag-asawa nga Duterte-Carpio bangud sa mga asset kag income nga wala nalakip sa ila joint Statement of Assets, Liabilities and Net Worth ukon SALN, lakip na ang kita nga gina-link sa Cale88.#