Ginkwestyon sang prosecution team ang defense witness nga si Department of Trade and Industry (DTI) Undersecretary Ceferino Rodolfo kun nagatuman ang Cale88 Foods Corporation sa requirement sang Board of Investments (BOI) nga magtanum sang indi magnubo sa 100 ka puno sang kahoy halin sang natukod ang kompanya.
Wala ini nasabat ni Rodolfo bangud wala siya nakapartisipar sa mga tree-planting activities sang Cale88.
Antes sini, matandaan nga ginpamangkot sang prosekusyon kun may kaangtanan ang tree-planting activities ni Vice President Sara Duterte sa compliance sang kompanya sa amo nga requirement.
Apang nagpamalabag ang abogado sang depensa nga si Atty. Justin Gular kag ginlaragway ang pamangkot sang prosekusyon nga “misleading, malicious kag callous.” Suno kay Gular, wala sang nauna nga testimonya nga nagapamatuod nga nakigbahin ang bise presidente sa tree-planting compliance sang Cale88.
“There is no prior testimony coming from the witness wherein he testified that the Vice President participated in the compliance requirement of tree planting,” suno kay Gular.
“The insinuation being made by the prosecution that the pictures being shown or that was displayed of the Vice President planting trees had any relation to the Cale 88 Foods Corporation’s registration is misleading, malicious, and callous, Your Honor,” dugang sini.
Dugang pa ni Rodolfo, wala nag-avail ang Cale88 sang income tax holiday, isa sa mga insentibo nga ginahatag sang gobyerno sa mga kwalipikado nga negosyo, gani wala man gin-usisa ang compliance sang kompanya para sa amo nga benepisyo.
Ang pagpamangkot ang kasunod sang pagpakita sang prosekusyon sang mga litrato ni Duterte nga nagatanom sang kahoy, agud usisaon kon may kaangtanan ini sa obligasyon sang Cale88 sa BOI.#














