Gintawag ni outgoing US President Donald Trump nga “absolutely ridiculous” ang impeachment nga ginaduso batok sa iya.
Suno kay Trump, akig siya sa scheduled impeachment sa House of Representatives bangud nagapakita lang ini sang pagpadayon sang “greatest witch hunt” sa maragtas sang pulitika sa Estados Unidos.
Apang sa pihak sini, gin-athag ni Trump nga indi niya luyag ang dugang nga gamo ukon kalakasan sa pungsod.
Sang ginpamangkot kun nagabatyag siya nga responsable siya sa natabo nga riot sa US capitol sang nagligad nga Enero 6, ginpahayag ni Trump nga wala sang sala sa iya una nga anunsyo sa iya nga mga supporters.
Matandaan nga protesta lang kuntani ang tuyo sa US capitol sang nagligad nga Enero 6 agud punggan ang sertipikasyon sang pagdaug ni US President-elect Joe Biden apang nagresulta ini sa mga kalakasan kun sa diin lima ang ginbawian sang kabuhi.
