ILOILO CITY – Gin umpisahan na ang imbestigasyon kaangot sa paglupok sang power barge sa Bo. Obrero, Lapuz Iloilo City nga gintunaan sang oil spill sa Iloilo Strait tubtub sa baybayon sang Guimaras.
Sa exclusive interview sang Bombo Radyo Iloilo kay Mr. Gabino Ramon Mejia, pinuno sang Plant Operations sang Ayala Company na AC Energy Corporation, iya ginpahayag nga nagkuha sila sang consultants kag marine biologist agud magbulig sa pagtumod sang oil spill kag sa pagtapna sini.
Suno kay Mejia, sa sulod sang tatlo tubtub lima ka adlaw, magapagwa sila sang resulta sang imbestigasyon sa paglupok sang Power Barge 102 nga naga unod sang 260,000 nga litro sang bunker fuel.
Ginkumpirma man ni Mejia nga may ginapatigayon nga maintenance kaangay sang pagpaminta kag pag-welding antes matabo ang pagsigabong.
Nag hire naman sang mga tawo ang nasambit nga kumpaniya agud magbulig sa pagkuha sang nagtagas nga bunker fuel sa mga coastal areas.
Gin-athag man sang natungdan nga may ara sila sang spill boom nga nabutang sa palibot sang barge agud magpugong sang oil spill, apang bangud sa mabaskog nga balod, nagtagas ang bunker fuel sa baybayon.
