Napatay na sa edad nga 55-anyos ang anay alkalde sang Pagsanjan, Laguna nga si Girlie Javier-Ejercito nga kilala man sa stage name nga si Maita Sanchez sang yara pa sa movie industry.
Ang iya bana nga si former Laguna Gov. E.R. Ejercito ang nagkumpirma sang masubo nga balita nga ginbawian sang kabuhi ang anay aktres samtang yara sa St. Luke’s Medical Center sa Quezon City.
Nagsuprer ini sang endometrial cancer.
“Our family is requesting prayers and mass offerings for the repose of her soul. Heartfelt thanks for all your love and prayers,” pahayag sang anay gobernador.
Patigayunon ang haya sini tubtub sa Nobyembre 9 sa Don Porong Ejercito Ancestral Mansion sa Pagsanjan.
Nagserbe si Javier-Ejercito bilang mayor sang amo nga banwa halin sang 2010 tubtub 2019 kag nangin vice mayor halin sang 2019 tubtub sang 2022.
Na-eleher man siya bilang national President sang League of Municipalities of the Philippines (LMP) halin sang 2010 tubtub sang 2016.
Antes ang iya karera sa pulitika, nangin kilala siya sa showbiz industry halin sang 1988 ilabi na sa action films kaupod ang anay King of Philippine Movies nga si Fernando Poe Jr.
Nalakip siya sa mga pelikula nga Sa Dulo ng Baril (1988), Lagalag: The Eddie Fernandez Story (1994), Minsan Pa: Kahit Pagtingin Part 2 (1995), Hagedorn (1996), Pagbabalik ng Probinsyano (1998), Ang Dalubhasa (2000), kag Batas ng Lansangan (2002).
Base sa iya IMDb database entry, ulihi nakit-an si Maita sa Shake, Rattle & Roll The Extreme nga ginpaguwa sa mga sinehan sang 2023.
