Ginpanubo sang Civil Aeronautics Board (CAB) ang fuel surcharge level para sa mga flight diri sa Pilipinas kag sa luwas sang pungsod para sa nauna nga 15 ka adlaw sa Mayo.
Sa abiso sang CAB, gin-set ang fuel surcharge sa Level 18 sa Mayo 1-15 nga mas manubo sa Level 19 sang Abril 16-30.
Sa idalom sang Level 18, yari ang ibayad sang mga pasahero sa mga flight:
- P593 to P1,734 sa domestic flights (depende sa flight distance)
- P1,958.44 to P14,561.87 sa international flights halin sa Pilipinas (depende sa flight distance)
Sa idalom naman sang current level 19:
- P627 to P1,824 sa domestic flights (depende sa flight distance)
- P2,070.77 to P15,397.15 sa international flights (depende sa flight distance)
Ang fuel surcharge amo ang optional fee nga lain pa gid sa base fare. Ginasukot ini sang airlines sa mga pasahero agud nga maka-recover sa gasto sa jet fuel.
Gina-adjust sang CAB ang fuel surcharge depende sa price movement sang jet fuel. Indi ini kabahin sang basic airfare kag mahimo ini mapasaka ukon mapanubo depende sa presyo sang jet fuel sa market.
Kinaandan nga tag-isa ka bulan ang adjustment nga ginahimo sang CAB.
Halin sang nagsugod ang gyera sa Middle East nga nag-apekto pati sa ekonomiya sang Pilipinas, gin-implementar sang CAB ang fuel surcharge level adjustment sa kada 15 ka adlaw. Isa ini ka interim kag temporary measure para nga mapadasig ang response sa kada paglain sang presyo sa market.#
