Isa ang patay kag isa ang nasamaran sa sunog nga nagluntad sa Barangay Anoring, Sara, Iloilo kagab-i.
Ang ginbawian sang kabuhi amo si Marina Sanico, 80-anyos nga tigulang nga na-trap sa balay kun sa diin gin-report nga nag-umpisa mismo ang sunog.
Sa inisyal nga impormasyon, bedridden na ang biktima.
Magluwas sa iya, nakaangkon man sang mga injury ang iya utod nga si Melvin kag padayon nga ginabulong sa ospital.
Sandig sa Sara Municipal Fire Station, tatlo ka balay ang totally burned samtang duha naman ang partially burned.
Apat ka pamilya ang apektado sa amo nga fire incident. Magluwas sa ila, apektado man ang 17 ka boarders nga lunsay mga estudyante sang Northern Iloilo State University (NISU).
Nahibaluan nga pasado alas nueve sa gab-i sang na-report ang sunog, nagdangat sa second alarm, tubtub nga gindeklarar sang Bureau of Fire Protection (BFP) nga fire out sang pasado na 12:00 sa kaagahon.
May naga-gwa sa inisyal nga impormasyon nga naghalin ang kalayo sa ginsindihan nga katol, apang ginahulat pa ang opisyal nga resulta sang imbestigasyon sang fire station kag ang balor sang halit nga ginbilin sang sunog.#
Screegrab from: Chin Chin Aspera Artizona/FB
