ILOILO CITY – Indi lang limitado sa maghimata ukon magkahagugma ang Valentine’s Day; tion man ini agud ipabatyag ang pagtatap kag pagpalangga sa tunga sang mga tawo nga indi magkadugo.
Ini ang may kaangtanan man sa hingyo sang lead social protection agency nga Department of Social Welfare and Development (DSWD) sa publiko nga suportahan ang legal adoption advocacy para sa best interest sang abandoned, neglected, orphaned, kag surrendered children.
Subong nga tuig, ang Adoption Consciousness Celebration ang may tema nga “Pagmamahal Palaganapin, Legal na Pag-aampon Ating Gawin!”
Ini ang kabahin sang pagpaninguha sang DSWD agud masigurado nga ma-promote ang legal adoption bilang isa ka sahi sang unconditional love sa tunga sang ginikanan kag sang ila nga adopted children.
Suno sa DSWD, ang legal adoption amo lamang ang nagaisahanon nga paagi agud mapat-od nga tupong lang ang kinamatarong sang adopted children sa kinamatarong sang biological children.
Sa interview sang Bombo Radyo kay Mrs. Reinalyn Cabag, isa ka adoptive parent kag subong head sang Membership Panay Adoptive and Foster Parents Association, iya ginpahayag nga tuman ka tahum sang balatyagon sang mga ginikanan kun makit-an nga nagadaku na ang adopted child.
Suno kay Cabag, dapat maintindihan sang publiko nga dapat mag-agi sa husto kag legal nga proseso ang adoption kag indi dapat pagtagu-taguon.
Sa may mga pamangkot may kaangtanan sa legal nga proseso sang adoption, pwede mapadala ang inquiries paagi sa DSWD online adoption helpdesk link nga yara nakapost sa official page sang DSWD.
