ILOILO CITY – Magapagwa sang advisory ang Department of Interior and Local Government sa tanan nga mga Local Government Units may kaangtanan sa mando ni Presidente Rodrigo Duterte nga paghawan sang mga dalanon gikan sa road obstruction.
Sa interview sang Bombo Radyo kay Department of Interior and Local Government Region 6 Director Engr.Ariel Iglesia, iya ginpahayag nga apisar wala pa sang written memorandum nga ginpagwa si Presidente Duterte,apang klaro ang nangin pahayag sang presidente sa iya nga State of the Nation Address gani nagakadapat nga tumanon ini sang mga local chief executives.
May kaangtanan naman sa mga obstruction sa national roads, ginpahayag ni Iglesia nga ang may mayor nga katungdanan sini amo ang Department of Public Works and Highways apang nagakadapat nga may koordinasyon sa gihapon sang mga Local Government Units.
Suno sa Regional Director, ila naman i-monitor ang pagtuman sa mando sang Presidente sang mga local chief executives kag kun mapaslawan, i-rekomendar sang Department of Interior and Local Government ang pagsuspend sa ila.
Samtang istoryahon naman ni Iglesia si Iloilo City Mayor Jerry Treñas tuhoy sa dalan sa kilid sang Plaza Libertad nga ginhimo nga parking area sang mga empleyado sang Iloilo City Hall kag mangin sang mga opisyal sang syudad.
