Mangin mabudlay ang banas sang Alas Pilipinas sa imbukada pa lang nga round sang FIVB Men’s Volleyball World Championship 2025 matapos nga nagrupo ini kaupod ang Iran, Egypt, kag Tunisia.
Awtomatiko nga yara sa Pool A ang Pilipinas bangud amo ini ang host country, samtang nagguwa naman ang mga pangalan sang tatlo ka pungsod sang ginpatigayon ang draw kagab-i, Septyembre 14.
Natalana ang world championships sa Smart Araneta Coliseum kag Mall of Asia Arena sa September 12-28 sa masunod nga tuig.
Ang Alas ang subong napaidalom kay Italian coach Angiolino Frigoni kag nagapang-64 sa world rankings. World No.15 kag Asian championship runner-up naman ang Iran; World No.20 kag African champion ang Egypt; samtang 11-time African titlist ang Tunisia nga amo man ang World No. 24.
Sa pihak nga bahin, ginlapta naman kagab-i ang iban pa nga top-ranked teams sa pito ka iban pa nga mga grupo kun sa diin nagtupa ang World No.1 nga Poland sa Pool B kaupod ang Netherlands, Qatar, kag Romania.
Nagapanguna naman sa Group C ang Olympic champion France kaupod ang Argentina, Finland, kag South Korea. Atubangon sang Team USA ang Cuba, Portugal, kag Colombia sa Group D.
Masambuwa naman ang Slovenia sa Pool E kaupod ang Germany, Bulgaria, kag Chile, samtang ang defending world champion nga Italy ang nabutang sa Pool F kaupod ang Ukraine, Belgium, kag Algeria.
Sa Pool G naman ang fan favorite nga Japan kaupod sa Canada, Turkiye, kag Libya, samtang ang Brazil ang magahampang batok sa Serbia, Czechia, kag China sa Pool H.
Ang duha ka nagapanguna nga teams sa kada pool amo ang maga-abanse sa knockout stage sang competition.
Magluwas sa draw, ginpatigayon man kagab-i ang official turnover sang FIVB trophy sa Philippine Local Organizing Committee sa pagpanguna ni Co-Chairperson William Vincent Araneta Marcos kag Senator Alan Peter Cayetano.
Maragtason ini nga hinampang bangud ini ang labing-una nga tion nga maga-host ang Pilipinas sa World Championships kag una man ini sa Southeast Asia.
