Alex Eala, nataktak na sa Miami Open matapos ginlutos sang isa na naman ka Czech player

Napaslawan si Alex Eala nga mapanas ang “sumpa” batok sa mga kasumpong sini halin sa Czech Republic.

Natapos ang kampanya sang Pinay tennis star sa round of 16 sang Miami Open sa Florida, USA sa kamot sang isa na naman ka Czech player nga si world No. 14 Karolina Muchova.

Ginbudlayan si Eala nga makakuha sang momentum.

Nagtakop ang hampang sa skor nga 6-0, 6-2 pabor sa French Open finalist.

Ini na ang pang-13 nga tion nga nakaatubang si Eala sa isa ka Czech tennis player halin sang nangin professional siya sa amo nga sport sang 2020, kag tubtub subong, wala pa ini nakaagi daog batok sa ila.

Subong lamang nga tuig, pangatlo na niya ini nga kalutusan sa kamot sang Czech matapos ginpierde man nanday Tereza Valentova sa round of 64 sang Qatar Open kag Linda Noskova sa round of 16 sang Indian Wells Open.

Nagapang-29 subong si Eala sa WTA rankings, apang ginalantaw nga maganubo ini sa pwesto matapos nga 120 puntos lang ang na-cover siya sang iya Miami run subong nga tuig sa 390 points nga iya naganar sang nakalab-ot siya sa final four sa amo man nga tournament sang nagligad nga tuig.