Ginalauman nga igasaylo na si dismissed Bamban, Tarlac Mayor Alice Guo sa Pasig City Jail Female Dormitory subong nga adlaw, Septyembre 23.
Ginkumpirma man sang Bureau of Jail Management and Penology (BJMP) nga makaupod sini sa detention cell ang isa ka akusado nga kaupod ni Kingdom of Jesus Christ (KOJC) Pastor Apollo Quiboloy.
Suno kay BJMP Spokesperson JSupt. Jayrex Bustinera, wala sila sang espesyal nga preparasyon para magligwa ang espasyo para kay Guo — buot silingon, kun ano ang itsura sang presuhan, amo man ini gihapon kag wala sang pinasahi nga treatment nga ihatag sa anay alkalde.
Sa pihak nga bahin, ang abogado naman ni Guo nga si Atty. Nicole Jamilla ang nag-file sang urgent motion sa Pasig Regional Trial Court (RTC) nga naga-request nga ipabilin lang ang anay alkalde sa PNP custodial facility sa Camp Crame.
Matandaan nga wala nadayon ang pagsaylo kay Guo sang Biyernes sang gab-i bangud wala pa nakumpleto sang mga pulis ang mga dokumento para sa transfer.
Lakip sa gin-require amo ang pagpaidalom sini sa medical examination kaangay sang x-rays kag ECG reading bangud 44 ang makaupod sini nga Persons Deprived of Liberty (PDLs) sa detention cell kag dapat siguruhon nga wala ini sang makalalaton nga sakit.
