Patay ang aktibo nga miyembro sang Philipine National Police nga na-assign sa Sagay City Police Station matapos nga gintiro sang pito ka tuig sini nga bata sa Purok Eba, Brgy. Andres Bonifacio, Sagay City, Negros Occidental.
Ang biktima amo si Police Staff Sergeant Lernie Alacha, 44, residente sang amo nga lugar.
Sa interview sang Bombo Radyo sa live-in partner sang pulis nga si Iren Dayanan, iya ginpahayag nga nagapanyaga sila nga duha kaupod ang ila bata nga pito ka tuig kag hinablos ni Iren.
Samtang nagalantaw sa Tiktok account sa cellphone ni Iren, may yara sang nakita ang pulis nga rason nga nagpangimon ini.
Nagluntad ang argumento sa tunga nila nga duha tubtob nga ginkuha sang pulis ang Glock 17 pistol caliber 9mm sini nga armas.
Suno kay Iren, nagpamahog pa ang pulis nga nga patyon siya kag kasunod sini amo nga utason niya ang iya kaugalingon nga kabuhi.
Wala nanotisyaran sang duha nga ginkuha sang bata ang M16 rifle kag ginkasa apang wala naglupok.
Samtang, naga-agaway naman sang pusil ang pulis kag si Iren, nagtabog ang caliber 9mm kag nagsinggit si Iren nga ipalayo kag taguon ang armas-luthang, apang mahimo nga nakuha ini sang pito ka tuig nga bata kag gintiro ang iya amay.
Naigo sa liog ang amay kag nakahinambit pa ini nga siya ang gintiro sang iya bata antes ini natumba kag nadulaan sang kabuhi.
Ginhingagaw naman ni Iren kuha ang armas-luthang sa bata sang nakita sini nga liwat pa kuntani sini nga tiruhon ang iya amay.
Suno pa kay Iren, makapila na ka beses nga nagapamahog si Lernie nga patyon siya kag sa tion nga siya ang akig, nagapalupok ini sa gwa sang ila balay.
Gin-alegar man sini nga nakaagi naman nga nagtuyo ang biktima nga utason ang kaugalingon nga kabuhi apang ginpunggan ini ni Iren.
Suno pa diri, ginpahayag man sadto sang bata nga kuntani ginpabay-an na lamang sini nga mapatay ang iya amay.
Dugang pa ni Iren, masami sila nga naga-away ni Lernie bangod sa pagpangimon sa sulod sang 13 ka tuig na nila nga pag-updanay.#
(Article is from Bombo Radyo Bacolod)
