Malapit na matuman ang handum sang 39-anyos nga superstar nga si LeBron James nga makahampang kaupod sa iya anak sa National Basketball Association (NBA) antes siya mag-retiro sa basketball.
Ini matapos ginpili sang iya team nga Los Angeles Lakers ang iya subang nga anak nga si Bronny James sa second round sang 2024 NBA Draft.
Siya ang No. 55 overall pick base sa anunsyo ni NBA deputy commissioner Mark Tatum: “With the 55th pick in the 2024 NBA draft, the Los Angeles Lakers select Bronny James from the University of Southern California.”
Ang pagpili sa iya ang indi garantiya nga insigida nga dungan na sila makahampang nga mag-amay sa Lakers kag indi man ini garantiya nga sulod na si Bronny sa masunod nga roster sang team sa masunod nga season. Apang ginpasaka sini ang posibilidad nga mangin labing-una si Bronny kag LeBron nga father-son on-court duo nga dungan makahampang sa liga.
Matandaan nga sang nagligad nga bulan sang nag-deklarar ang 19-anyos nga player nga magapapili ini sa liga apisar sang isa ka tuig lang sini nga eksperyensya sa college basketball sa Southern California kun sa diin naka-average ini sang 4.8 points, 2.8 rebounds kag 2.1 assists per game sang nagligad nga season.
Antes pa man nagsugod ang iya collegiate career, nagsuprer pa ini sang cardiac arrest sang Hulyo 2023 kag sang ulihi ginsapubliko nga may yara siya sang congenital heart defect.
Apisar sini nga kondisyon, sang nagligad nga bulan, nahatagan ini sang medical clearance nga makahampang sa NBA.
Ang iya amay nga si LeBron nga amo ang scoring leader kag four-time champion sa NBA kag subong naga-edad na sang 39-anyos ang magasulod na sa iya ika-22 nga season sa liga.
