ILOILO CITY – Ginhangkat ni anay presidente Rodrigo Duterte ang bilog nga Philippine National Police nga magpanaog sa pwesto kag gin-akusahan ang mga ini nga amo ang “gatekeeper” sang illegal drug trade sa pungsod.
Suno kay Duterte, madamo ang mga pulis nga may kaangtanan sa iligal nga droga lakip na ang pila ka mga heneral.
Kahapon, ginkumpirma ni Interior Secretary Benhur Abalos nga napasaka na sang National Police Commission kag sang Philippine National Police ang mga criminal complaints sa Office of the Ombudsman batuk sa 50 ka mga police personnel nga ginasuspetsahan nga may kaangtanan sa 990-kilogram shabu drug haul sang Oktubre sang nagligad nga tuig.
Pahayag ni Duterte, kun siya pa ang presidente, manduan niya ang bilog nga Philippine National Police nga i-surrender ang tanan nga issued kag illegal firearms sa sulod sang 24 oras kag pasugtan ang Armed Forces of the Philippines nga mag-take over.
Kasunod sang involvement sang pulis sa illegal drugs, ginpahayag ni Duterte nga mas nagasalig na siya subong sa Armed Forces of the Philippines kun ipaangid sa Philippine National Police.
Ini bangud nga nahibaluan sang Armed Forces of the Philippines kun ano ang makapaayo kag makapala-in sa pungsod.
Sa tion sang termino ni Duterte, ginlunsyar niya ang madugu-on nga war on drugs nga nagkuha sang kabuhi sang masobra 12, 000 nga mga Pilipino kun sa diin, ang kalabanan diri ang kabahin sang urban poor sector sang pungsod.
Suno sa Human Rights Watch, indi magnubo sa 2,555 nga kaso sang pagpamatay ang gin-angut sa Philippine National Police.
Ginbasura sang International Criminal Court ang apelar sang Pilipinas nga bawion ang desisyon sang korte nga buksan ang imbestigasyon sa drug war.
