ILOILO CITY- Mas nagapag-on pa gid ang anggulo nga accidental firing ang kabangdanan sang kamatayon ni PSSgt Erwin Daniel nga katapo sang Special Weapons and Tactics (SWAT) Team sang Iloilo City Police Office (ICPO).
Si Daniel ang napatay sang matiruhan ang iya kaugalingon sa dughan sa presensya sang iya asawa kag kabataan samtang yara ang mga ini sa sulod sang kwarto sang isa ka hotel sa Iloilo City Proper sang Disyembre 30.
Sa interview sang Bombo Radyo kay PMajor Shella Mae Sangrines, hepe sang Iloilo City Police Station Number 1, iya ginpahayag nga base sa ginpagwa na nga official statement sang asawa ni Daniel, gintuad sini nga wala niya makita ang akto sang pagluthang sang iya bana sa iya kaugalingon.
Apang suno sa asawa, antes niya nabatian ang lupok sang pusil samtang ginaatender niya ang ila kabataan, ginahimos sang bana kag iban nga pagkabutang.
Ginpahayag ni Sangrines nga sa subong, ginahulat na lang ang resulta sang paraffin test kag autopsy sa biktima.
