Ginpaathag sang isa ka abogado kun ngaa mabulubudlayan ang gobyerno sang Pilipinas nga mapabalik sa pungsod si former Ako Bicol Rep. Zaldy Co matapos nga naaresto ini sa Prague, Czech Republic.
Sa interview sang Bombo Radyo kay Atty. Kaiser Cordero, CEO kag Founding Partner sa Cordero and Associates, iya ginpahayag nga duha ka proseso ang posible nga agyan sang Philippine government nga amo ang deportation kag extradition.
Mahimo ma-deport si Co bangud naaresto ini nga nagsulod sa border nga wala sang husto nga documentation — isa ka paglapas sa immigration laws.
Unilateral ang deportation, buot silingon, magahalin ang initisyatibo ukon hulag sa state kun sa diin siya nadakpan.
Apang pahayag ni Cordero, sa idalom sang deportation, magalawig pa ini bangud nga magaagi ini sa judicial process ilabi na kun magadepensa man si Co. Kun may preliminary findings na para sa deportation, mahimo pa gihapon makaapelar ang anay kongresista.
“The threat with the deportation is this could be questioned judicially in Czech Republic. In other words, it will delay the process, kay basi kun may defenses against violation of an immigration law. Indi ina madali-dali nga ma-undertake sang Czech Republic,” suno pa sa abogado.
Sa extradition naman suno kay Cordero, mabudlayan man ang Pilipinas bangud wala ini sang extradition treaty sa Czech Republic.
“Malabo because of the absence of the treaty,” dugang sini.
Sa personal nga paglantaw ni Cordero, mahimo nga ipaagi ini sang Philippine government sa diplomatic process ukon ang pagpakig-istorya sa Czech government.
Nahibaluan nga may Red Notice nga gin-request sa International Criminal Police Organization (Interpol) sang Nobyembre 2025 batok kay Co.
Paathag ni Cordero, sa operating principle sang Interpol Red Notice, ang tawo nga pugante ukon “fugitive from justice” ang mahimo masaylo sa isa ka state paagi sa diplomatic channels sa tunga sang involved nga mga gobyerno.
Pebrero 2026 sang gindeklarar si Co nga fugitive from justice.
MAGA-APPLY PARA SA ASYLUM?
Ginpatpat man sang abogado nga mahimo mangayo sang asylum si Co sa amo nga European country agud maatrasar ang pagpabalik sa iya sa Pilipinas.
Suno kay Cordero, sa idalom sang international law, ang mga naga-apply para sa asylum sa idalom sang status determination procedures ang indi mahimo mahatag sa requesting state samtang pending pa ang aplikasyon.
Sa Principle of Non-Refoulement, ang pagsuludan amo nga indi mabalik, ma-expel, ukon ma-extradite ang isa ka asylum-seeker sa pungsod kun sa diin nahadlok siya sa persecution.
Suno kay Cordero, kun hingyuon sang kampo ni Co ang asylum agud madeklarar nga refugee, ang mga ground nga mahimo gamiton amo ang kahadlok sini sa persecution.
Nahibaluan nga una na nga ginpahayag sang Department of the Interior and Local Government (DILG) nga posible nga tubtub sa tatlo ka semana pa antes mapapauli si Co sa Pilipinas. Wala ginsapubliko sang ahensya kun ano ang ila game plan agud nga mapabalik ang pugante nga anay kongresista.
Wala man sang detalye nga napatpat sa publiko kaangot sa ila pagpakig-angot sa Czech government.
ANO KADAKU NGA ISDA SI CO?
Si Co amo ang former chairman sang Appropriations Committee sa Kamara.
Wanted siya halin sang Nobyembre 2025 bangud sang kaso nga graft kag malversation nga naangot sa mga anomaliya sa P289.5-million flood control project sa Oriental Mindoro.
Nag-resign siya bilang congressman sang Septyembre 2025 matapos gin-akusaran nga mastermind sang binilyon ka pesos nga flood control kag iban pa nga infra budget insertions sa 2025 budget.
Sa sunod-sunod nga mga expose sini sang 2025, gin-implicate sini si President Bongbong Marcos kag former House Speaker Martin Romualdez sa binilyon ka pesos nga insertions sa 2025 national budget.
Nagpanindugan ini nga nagsunod lamang siya sa mga mandu kaangot sa ginaalegar nga budget insertions.
Sa iya videos sang nagligad nga tuig, nagpahayag ini nga indi siya magpauli sa Pilipinas bangud may nagaplano nga ipapatay siya.#
