Nagpaandam ang National Security Council (NSC) nga indi magpang-alang-alang ang gobyerno sang Pilipinas sa paggamit sang bug-os nga pwersa batok sa mga nagatuyo nga tungaon ang republika ukon i-withdraw ang ano man nga parte sang nasyon.
Suno kay NSC adviser Eduardo Año, nagapabilin nga malig-on ang gobyerno sa pag-proteher sang soberanya kag integridad sang teritoryo sang pungsod.
Ginsiling man sini nga importante ang national unity, security kag stability, kag ang pagpanawagan nga tungaon ang nasyon ang magapatiphag lamang sang pag-uswag sang Pilipinas.
“Any attempt to secede any part of the Philippines will be met by the government with resolute force, as it remains steadfast in securing the sovereignty and integrity of the national territory,” kabahin sang statement.
Sa amo nga official statement, ginpahangop man ni Año nga ang kusog sang Pilipinas ang nakabutang sa pag-isa sang mga Pilipino, gani ano man nga tuyo nga bahin-bahinon ang pungsod ang dapat nga ibasura sang tanan nga sektor.
Pahayag pa sini, ang pagpanawagan nga tungaon ang Pilipinas ang nagakontra sa Konstitusyon.
“It is imperative for all Filipinos to uphold the principles enshrined in our Constitution which espouses the unity and territorial integrity of our nation. Any suggestion of secession not only runs counter to the Constitution but also threatens to undo the hard-won gains of peace and development, particularly in Mindanao.”
Wala ini sang ginhingadlan nga tawo nga may tuyo ukon may ginaduso nga secession apang ini nga statement ang ginpaguwa kasunod sang panawagan ni anay President Rodrigo Duterte sang nagligad nga semana nga i-separar ang Mindanao sa Pilipinas.
Si Año amo man anay ang Commanding General sang Philippine Army, chief of staff sang Armed Forces of the Philippines (AFP), kag tiglikom sang Department of the Interior and Local Government (DILG) sa idalom sang Duterte administration.
Antes ang statement sang National Security Council, nagpaguwa man sang opinyon ang mga public officials sa Maguindanao del Sur, Sultan Kudarat kag Camiguin nga nagapamatok sa plano ni Duterte nga i-separar ang Mindanao.
Si Presidential peace adviser Carlito Galvez Jr. nga anay AFP chief man sa Duterte administration, ang nagpanawagan man sa publiko nga ibasura ang panawagan sang anay presidente bangud magadulot lamang ini sang destabilisasyon sa pungsod.#
