ANTIQUE– Nagsugot na lang si Antique Governor Rhodora Cadiao nga mag-require man sang negative reverse transcription-polymerase chain reaction (RT-PCR) test result sa mga byahero nga magasulod sa probinsya sang Antique.
Matandaan nga una na nga nagpanindugan si Cadiao nga indi lang magsunod sa iban nga local chief executives sa Rehiyon VI para sa swab test requirement sang locally stranded individuals (LSIs), returning residents, Authorized Persons Outside Residence (APOR), kag domestic travelers sa Antique bangud lima na sila ka bulan nga wala naga-swab test kag indi masarangan sang mga Antiqueño ang presyo sa COVID-19 testing.
Sa interview sang Bombo Radyo kay Cadiao, iya ginpahayag nga nagpahanugot nalang ang probinsya nga magsunod sa uniform implementation sa rehiyon para sa ‘safety and unity’ apang indi man ini permanente nga requirement.
Ang swab test requirement ang inisyal nga nakasugtan nga ipatuman tubtob sa Abril 10 apang suno kay Cadiao, pwede ini nga mapalip-ot kun magpanaug naman ang kaso sang COVID-19 sa Western Visayas.
Gin-ako man ni Cadiao nga may yara na sang “COVID-19 surge” sa Antique bangud nagalab-ot na sa 11 ang ila marekord nga COVID-19 cases daily.
Kalabanan sa nagadugang amo ang local cases.
Sa record sang Antique Provincial Health Offic, nakasaad nga 133 na ang total cases sa probinsya: 92 ang lokal, 6 ang ROFs, 17 ang LSIs kag 18 ang halin sa sa gwa sang probinsya.
15 sa sini ang aktibo nga kaso kag apat ang napatay.
Ini ang rason suno kay Cadiao nga dapat padasigon na ang vaccine rollout kag hatagan na sang go-signal ang LGUs nga maka-procure sang bakuna.
May pasalig ang DOH nga dugangan ang vaccine supply nga maabot sa Antique antes matapos ang bulan sang Marso apang indi ini gihapon bastante.
Ginabanta 10,000 ang frontliners sang Antique apang ang una nga nag-abot nga bakuna ang bastante lang para sa kapin 1,000 ka mga tawo.
Nagpahayag man si Cadiao nga may yara na sila sang napain nga P100 million nga pondo para sa pagbakal sang vaccines.
