ILOILO CITY- Ginahulat na lang ni Iloilo City Police Office Director PCol. Joeresty Coronica ang approval ni Police Regional Office 6 Director BGen. Leo Francisco sa listahan sang i-relieve nga mga personnel sang Mandurriao Police Station kag City Drug Enforcement Unit.
Sa interview sang Bombo Radyo kay Col. Coronica, iya ginpahayag nga sa bahin sang Mandurriao Police Station, yara sa 60-80 ka personnel ang ipa- relieve kalakip na ang hepe nga si PCapt Benjie Dicen apang sa Drug Enforcement Unit naman sang Iloilo City Police Office,tanan gid ang i-relieve.
Gin-athag ni Coronica nga may personnel sang Mandurriao Police Station nga wala ginlakip sa listahan sang ipa-relieve bangud nga wala man sang kahilabtanan sa illegal drug operation ang ila duty kag may mga designations man nga indi madali-dali nga mapaislan samtang si Dicen naman ang isaylo sa iban nga police station.
Suno kay Coronica, sa tion nga mapang-relieve na ang nasambit nga mga personnel, magahalin man sa Iloilo City Police Office ang igabulos sa Mandurriao Police Station.
Mayorya naman sa mga personnel nga i-relieve ang sayluhon sa Iloilo City Police Office.
Matandaan nga ginmando ni Francisco ang pag-relieve sa amo nga mga personnel bangud sa natabo nga anti-drug operation sa Brgy. Bakhaw, Mandurriao sang damlag lang kun sa diin 32 ka mga indibidwal ang naaresto.
