ILOILO CITY – May pila ka panugyan ang Archdiocese of Jaro tuhoy sa pagpatigayon sang Dominggo de Ramos.
Sa interview sang Bombo Radyo kay Rev. Fr. Angelo Colada, Director sang Social Communications sang Archdiocese of Jaro, iya ginpahayag nga magluwas sa misa, wala na sang iban pa nga aktibidad ukon public gatherings nga patigayunon bangud sa kahangawa sa Coronavirus Disease 2019 (COVID-19).
Suno kay Colada, mga pari kag ministro lang ang mahimo makasulod sa simbahan agud masunod ang ginapatuman nga physical distancing.
Sa pihak sini, mahimo sa gihapon nga makapamati sa santos nga misa paagi sa live coverage sang Bombo Radyo umpisa 8:00 subong nga aga nga pagapangunahan ni Jaro Archbishop Most Reverend Jose Romeo Lazo.
Tipunon sang frontliners kag barangay officials ang mga ramos sa kada barangay agud pagadal-on sa simbahan para sa bendisyon.
Sa mga naga-istar sa malayo nga lugar, gina-agda ang tanan nga magpamati sa misa paagi sa radyo kag mahimo nga makapangalawat paagi sa spiritual communion.
