ILOILO CITY- Hugot ang panindugan sang Simbahang Katolika sa pagpamatok sini sa pabulang sa distrito sang Jaro kadungan sang kafiestahan ni Nuestra Senora de la Candelaria.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga matuod nga may yara sang dala nga kalingawan ang aktibidad,apang makabig ini nga sugal bangud sa tuman ka dako nga kwarta nga involved kag ini ang wala ginatolerar sang simbahan.
Suno kay Msgr. Oso, apisar nga personal nga kwarta man ini sang mga manugbulang, wala dapat ini ginagasto sa kasubong nga pamaagi bangud base sa ginatudlo sang simbahan, ang kwarta may yara sang social responsibility.
Nag-apelar naman ini sa mga manugbulang nga sa baylo nga gastuhon ang kwarta para sa sugal, mas maayo nga ihatag na lang ang ila kwarta sa mga biktima sang sunog sa Molo.
Gindugang naman sang pari nga may bulang man ukon wala, madayon sa gihapon ang kapiestahan ni Nuestra Senora de la Candelaria.
Matandaan nga ginbasura sang Iloilo city Council ang request sang Iloilo Sportsmen, Inc. nga mag-isyu sang resolution of no objection para sa cock derby sa fiesta sang Candelaria bangud nga sa idalom sang layi, wala ginatugutan ang bulang nga magadungan sa period sang voters’ registration.
Nahibaluan nga sa Enero 31 ang ang katapusan nga adlaw sang registration para sa 2023 Barangay And Sangguniang Kabataan Elections kag gintalana ang bulang sa Jaro umpisa Enero 30 tubtob Pebrero 2.
