Naga-imbitar ang Archdiocese of Jaro sa tanan nga mag-upod sa patigayunon nga “Trillion Peso March” bwas nga hapon, nga maga-umpisa alas 3:00 sa Jaro Plaza kag maga-padayun padulong sa Iloilo Provincial Capitol.
Maga-upod man sa rally si Most Rev. Midyphil Billones, ang Arsobispo sang Jaro, kaupod ang mga miyembro sang simbahan, mga eskwelahan, kag iban pa nga sektor sang katilingban.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga madamo na ang nagsabat sa ila panawagan, labi na ang mga pamatan-on kag mga eskwelahan nga nagpakita sang suporta sa nasambit nga aktibidad.
Suno kay Msgr. Oso, nabatyagan sang pumuluyo ang kabudlay bangud sa halos isa ka trilyon pesos nga ginapatihan nga na-kurakot sang mga opisyal halin sa kaban sang bayan.
Dugang pa niya, ang rally kabahin sang mas dako nga panawagan sa gobyerno nga dapat pabayron, pasabton kag presuhon ang mga korap nga opisyal.
Ginkalipay gid ni Msgr. Oso ang aktibo nga partisipasyon sang mga tumuluo apisar pa nga naghalin pa ini sila sa malayo nga mga lugar, bilang pamatuod sang ila kahangawa sa nagakatabo sa pungsod.
Ginapanagabay man sini nga kuntani mangin malinong lang kag matalunsay ang rally bwas nga adlaw, Setyembre 21.
Nagalaom man ini nga pamatian sang gobyerno ang panawagan sang katawhan, agud mapasabata na ang mga responsable sa korapsyon kag makabangon liwat ang pungsod Pilipinas.
