Gin-athag ni National Bureau of Investigation (NBI) Director Atty. Melvin Matibag nga wala sang kaangtanan sa pagpangita kay Senator Ronald “Bato” dela Rosa ang plano nga pagpatawag ukon pag-isyu sang subpoena kay Nancy Dela Rosa nga asawa sang senador.
Suno kay Matibag, luyag lamang sang NBI nga mahibaluan ang kamatuoran kaangot sa ginahambal nga text message ni Nancy kay Senate President Alan Peter Cayetano.
Matandaan nga ang amo nga mensahe nagasiling nga “nakapalagyo” na si Dela Rosa sa tunga sang kinagamo sang kasunod sang Senate shooting sang Mayo 13 sang gab-i.
Ginsiling ni Matibag nga kon matuod ang amo nga impormasyon, kinahanglan ini imbestigaran agod mahibaluan kon gin-gamit bala ang shooting sa Senado bilang diversion agod mapadasig ang paghalin ni Dela Rosa.
Dugang pa niya, dapat man mapanabat ang sin-o man nga nagsugo kay Senate Sgt. At Arms Mao Aplasca, nga iya gintudlo nga nag-umpisa sang pagpalupok, bangud nabutang sa peligro ang kabuhi sang mga senador, mga empleyado sang Senado, kag mga miyembro sang media.
Ginpaathag man ni Matibag nga nakig-istorya na siya kay Senator Panfilo Lacson kag napaathag na niya ang iya posisyon may kaangtanan sa amo nga isyu.
Matandaan nga una na nagpahayag si Lacson nga indi dapat pag-i-subpoena sang NBI ang asawa ni Bato bangud nagapakita ini nga indi maayo ang ila intelligence work kag unprofessional pa. Suno kay Lacson nga amo anay ang hepe sang Philippine National Police (PNP), kun i-subpoena ang asawa, nagapakita man ini sang tinamad nga klase sang trabaho.#
