ILOILO CITY- Gintawag sang rebelde nga New People’s Army nga fake news kag drama ang ginpagwa nga impormasyon sang Philippine Army nga may natabo nga engkwentro sa Sitio Tigbanaba kag Sitio Maje, Brgy Curocuan, Igbaras, Iloilo sadtong Hunyo 6.
Sa interview sang Bombo Radyo kay Elias Hinganiban, tagpamaba sa Mount Napulak Command, iya ginpahayag nga rehearsed kag imbento lang ni Major Cenon Pancito III, tagpamaba sang 3rd Infantry Division sang Philippine Army ang ginpagwa nga impormasyon nga nagahimo sang focused military operation ang mga suldado sa lugar sang naka-engkwentro ang kapin 10 ka NPA members sa idalom sang Sibat Platoon, Southern Front Committee kag naglawig sang 20 minutos.
Suno kay Hinganiban,wala sang presensya sang ila unit sa nasambit nga lugar sang amo nga adlaw.
Dugang niya, ginahimo ini sang Philippine Army bilang kabahin sang paghuman sang serye sang koleksyon sang peke nga mga engkwentro.
Nanindugan naman ang Philippine Army nga may kamatuoran ang nasambit nga engkwentro.
Sa interview sang Bombo Radyo kay Major Pancito, iya ginpahayag nga indi mahimo magbutig ang ebidensya nga ila natipon gikan sa encounter site nga ginalakipan sang mga pulis,bala, magazine, mga war materials
kag mga dokumento.
Suno kay Pancito,mangin ang mga tawo sa palibot ang makapamatuod nga nagluntad ang nasambit nga encounter.
Dugang niya, kilala ang New People’s Army bilang mga butigon gani indi dapat pagpatihan sang tawo ang ila ginapanghambal.
