ILOILO CITY- Ka-Bombo, halimbawa, kun ikaw asawa nga ginbulagan sang imo bana, masulod man sa imo pinsar nga sukton siya sang tinuig nga pagserbisyo nimo sa iya kag sa inyo pamilya?
Base sa sini nga balita, makabinag- binag ka.
Didto sa Pontevedra, may isa ka asawa nga ginsukot ang iya bana sang minilyon ka pesos matapos nga ginbulagan siya sang lalaki.
Ang mag-asawa nagpakasal sang 1996 kag nagbulagay sila sang 2022.
Matapos sila nagbulagay, nagpabilin sa ila balay ang lalaki apang nagbiya naman ang babaye.
Bangud wala ini sang kwarta sa rason nga wala man ini sang trabaho bangud nga sa sulod sang 26 ka tuig nila nga pag-asawahay, wala ini ginpasugtan sang lalaki nga magtrabaho ini kag dapat nga magtutok ini sa iya responsibilidad bilang asawa kag anak sa ila nagaisahanon nga bata,didto na nagdesisyon ang asawa nga mag-demand sang bayad gikan sa iya bana kag gindangop niya ini sa korte.
Base sa inisyal nga ruling, gin-set sang korte nga bayaran sang lalaki ang babaye sang P6.5 million apang nag-ayo ang bana nga panubuan ini kag nagpasugot man ang korte gani sa baylo nga 6.5 million, ginhimo ini nga 4.5 million.
Magluwas diri, kinahanglan man nga maghatag ang bana sang 19,000 kada bulan sa iya anay asawa sa sulod sang tatlo ka tuig.
Pero, basi gapamangkot kamo kun diin ini nga Pontevedra…didto ini sa Espanya.
