Patay ang asawa samtang pilason naman ang iya nga bana matapos mabungguan ang ila ginasakyan nga tricycle sang nagasunod nga SUV sa Brgy. Cabugao Sur, Sta. Barbara, Iloilo.
Ang driver sang tricycle amo si Alyas Leo, 67-anyos, samtang ang asawa nga iya sakay amo si Alyas Virginia, 61-anyos, lunsay residente sang Brgy. Buyo sa amo nga banwa.
Ang driver sang SUV amo si Alyas Marvin, 28-anyos, kag residente sang San Julian, Janiuay, Iloilo.
Sa interview sang Bombo Radyo kay PCapt. Raphy Señeres, hepe sang Sta. Barbara Municipal Police Station (MPS), iya ginpahayag nga nagasundanay ang duha ka salakyan halin sa Sta. Barbara kag padulong sa porsyon sang Pavia, sang mahana na kuntani nga maliko ang tricycle, hinali lang nga nabungguan ini sang SUV.
Bangud sa impact, nag-awas sa tricycle ang mag-asawa kag nakaagum sang patal nga pilas sa ulo si Alyas Virginia nga gintunaan sang iya kamatayon, samtang menor nga kapilasan ang naagum sang iya nga bana.
Ginpasakaan naman sang panumbungon nga Reckless Imprudence Resulting to Homicide ang driver sang SUV.
