ILOILO – Yara na sa 80% ang assessment sang Office of Civil Defense 6 may kaangtanan sa halit sang Bagyo Ursula sa Western Visayas.
Santo sa data sang Office of Civil Defense 6, as of January 3, 2020, naglab-ot sa masobra sa 261,000 ka pamilya ang apektado, 26 ang patay, kapin sa 43,000 ka balay ang naguba kag masobra sa P2 Million ang balor sang halit sa Agrikultura.
Sa interview sang Bombo Radyo kay Office of Civil Defense 6 Director Jose Roberto Nuñez, iya ginpahayag nga sa Enero 7, Martes, magasapol ang tanan nga Provincial Disaster Risk Reduction and Management Officer sa rehiyon agud nga iplastar ang kabug-usan nga report.
Suno kay Nuñez, mahimo nga pagkatapos sang pagsinapol, makumpleto na ang report agud nga mahibalu-an ang kabug-usan nga halit sang bagyo.
Ginpahayag ni Nuñez nga nagakadapat nga mag-invest ang gobyerno sa pagpasangkad sang Disaster Risk Reduction and Management agud nga maangkon ang zero casualty sa tion nga may kalamidad.
