Gin-athag sang Department of Trade and Industry (DTI) nga wala pa ginapatuman ang automatic nationwide price freeze sa mga nagapanguna nga balaklon kag produkto pagkatapos sang deklarasyon ni President Ferdinand Marcos Jr. sang national energy emergency.
Ini matapos nagpagwa si Marcos sang Executive Order No. 110, nga nagdeklara sang state of national energy emergency kag nagmandu sang pag-adopt sang UPLIFT ukon Unified Package for Livelihoods, Industry, Food, and Transport nga nag-activate sang whole-of-government response.
Suno sa Republic Act No. 7581 ukon Price Act, insigida nga gina-freeze sang isa ka lugar ang presyo sang nagapanguna nga balaklon kon ini ideklara nga yara sa state of calamity, emergency, martial law, state of war, state of rebellion, kag kun ginsuspender ang writ of habeas corpus.
Ginpahayag sang DTI nga kasunod sang Executive Order 110, wala pa ginapatuman ang automatic nationwide price freeze sa idalum sang Price Act.
Nagapabilin naman nga alerto ang consumer protection teams sang ahensya.
Ang pinakabag-o nga monitoring sang DTI nagapakita nga may ara sang nagakaigo nga inventory sang mga nagapanguna nga balaklon
Sa karon, nagapabilin nga committed ang DTI sa pagbalanse sang interes sang mga consumer kag sang ekonomiya sang local manufacturers.
Suno naman kay Palace Press Officer Claire Castro, wala nila ginasarado ang posibilidad sang pagpatuman sang prize freeze.
Gindugang man sini nga ila pagatun-an ini sa senado kag ila pagabalansehon agud nga indi lamang ang isa ka sektor ang maapektuhan kundi balanse man para sa iban nga sector.
