Atensyon sa mga nagasagod sang manok–munga man ukon sulog!
Basi maka-relate ka sa sini nga espesyal nga balita.
Didto sa France, may isa ka tawo nga nagdangop sa korte agud ireklamo ang magahud nga pagpamalo sang manok sang iya tupadbalay.
Suno kay Franck nga amo ang tag-iya sang manok nga si Ricco, nakibot ini nga ginreklamo sang iya tupadbalay ang iya hinuptanan nga bantam nga manok.
Ang rason sang tupadbalay amo nga indi ini maka-enjoy sa iya garden kag indi man ini makatulog bangud sa kagahud kuno sang amo nga sulog.
Gintinguhaan nga ma-settle ini sa ila nga town hall apang wala gid sang solusyon.
Ginpamangkot pa gani ni Franck ang iban nila nga kaingodbalay kun nagahudan sila sa manok kag ang ila sabat, baliskad gid sa reaksyon sang tagreklamo bangud nanamian sila sa pagpamati kun ang manok nagapamalo.
Apang bangud nga indi gid mag-untat ang tagreklamo tubtob indi mangin malinong ang ila lugar gikan sa gahud sang manok, nagdangop gid ini sa korte.
Sa pagkamatuod, sa masunod nga tuig, natalana nga desisyunan ini sang judge.
Sa bahin naman ni Ricco, suportado ini sang publiko bangud may yara pa gani sang facebook support page nga ginhimo agud piliton ang tagreklamo nga magsaylo na lang sa ila nga lugar kag pabay-an ang manok nga magpaka-manok.
