ILOILO CITY- Kilalahon ta ang pinaka-sensitive nga tawo sa kalibutan.
Sensitibo ini, indi bangud nga mahapos ini nga magsunggod kag maghibi kundi, mahapos nga magbatyag ang lawas sini kun may makaon ini nga pagkaon nga indi masahuan sang iya lawas.
Siya si Jenna Gestetner, 21-anyos sang Los Angeles, California, nga na-diagnose nga may Mast Cell Activation Syndrome (MCAS) sa bata nga edad.
Ang MCAS kilala bilang kondisyon sa diin ang pasyente naga- eksperyensiya sang sulit-sulit nga episodes sang symptoms sang anaphylaxis — allergic symptoms kaangay sang paghabok-habok, low blood pressure, nabudlayan sa pagginhawa kag iban pa.
Sa pagkamatuod, may yara ini sang 100 tanan ka allergies kag ginalimitahan lamang nga magkaon sang 13 ka pagkaon.
Suno kay Jenna, humalin sang 12-anyos siya, sa kada tion nga may ginakaon ini, masami siya makabatyag sang paglingin sang ulo, pagpalanakit sang lawas, kakapoy kag iban pa tubtob nga naglala ini.
Kag sang ulihi, didto na ini na-diagnose nga may yara siya sang amo nga kondisyon.
Sa subong, ang 13 ka mga pagkaon nga mahimo niya i-enjoy ang ginalakipan sang white fish, turkey, green beans, zucchini, cucumber, lime, dates, grapes, raspberries, pears, chia seeds, water lily seeds kag olive oil.
