May mga tion gid nga kinahanglan naton ang break sa aton trabaho.
Gusto naton nga lain naman ang makit-an sang aton nga mga mata kag indi lang maglibut-libot sa hulot nga puno sang papel kag computer.
Apang dapat man nga hulaton mo kun san-o ikaw maka-leave.
Indi kaangay sini nga babayi nga gin-akusahan nga nag-peke sang 17 ka mga pagbusong sa nagligad nga duha ka dekada agud nga indi ini maka-obra kag ma-avail pa sini ang maternity benefits!
Ini amo si Barbara Ioele, isa ka 50-anyos nga Italian, kun sa diin base sa iya mga dokumento, sa nagligad nga 24 ka tuig, 17 ka tion gid ini nga nagbusong apang sa sini nga 17, ka-12 man siya mahululugan.
Lima ka beses naman siya nga nagbun-ag base gihapon sa amo nga dokumento kag iya pa ini ginpangalanan kanday Benedetta, Angelica, Abramo, Letizia, kag Ismaele.
Amo lang ina ugaling — wala na-rehistro ini nga mga kabataan kag wala sang nakakita sa ila bisan isa.
Ini ang rason kun ngaa natiktikan kag ginpaidalom sa monitoring si Barbara kun sa diin gina-claim sang otoridad nga may ebidensya na sila nga peke ang iya 17 tanan nga pagbusong.
Ginsiling nga ginhimo-himo lamang niya ang istorya agud ma-claim ang kabug-usan nga $120,000 ukon P6.7-million nga maternity benefits magluwas pa nga maka-eskapo ini sa trabaho.
Tuman ka dramatic ang istorya ni Barbara bangud sandig pa sa prosecutors, extra nga trabaho man ang ginhimo sang babayi agud mapapati ang iban nga nagabusong siya — halimbawa, nangawat ini sang birth certificates sa mga clinic sa Roma kag nang-forge sang mga pirma sang doktor, nagbutang sang ulunan sa pus-on, kag nag-rehearse kun paano maglakat nga daw nagabusong.
Sa interogasyon, nag-ako man ang 55-anyos nga partner ni Barbara nga si Davide Pizzinato nga nakahibalo siya nga wala nagabusong ang babaye.
Gin-ako man sini nga nakahibalo siya halin sang tuig 2012 kaangot sa pagpanunto sang iya partner.
Bisan sa sini nga mga testimoniya, ebidensya, kag mga pamangkot sa iya, hugot nga nagapanindungan si Barbara nga inosente siya sa kaso.
Apisar sini, nagapangatubang si Barbara sang posible penalidad nga pagka-preso bangud sang financial fraud, identity fraud, kag iban pa.#
