Peligruso ang bag-o nga layi sang China nga nagapahanugot sa Chinese coast guard nga magpangluthang sa mga foreign vessels nga posible magsulod sa kalalawran nga sakop sang ila nga pungsod.
Suno kay Senator Francis Tolentino, madamo nga mga manugpangisda ang maapektuhan sang bag-o nga layi sang China.
Ginpahayag sang senador nga posible mabutang sa risgo ang kabuhi sang mga manugpangisda nga halin sa Zambales, Mindoro, Palawan, Batangas kag Cavite.
Dapat man suno kay Tolentino nga hatagan sang pagtamod ang isa pa ka unod sang bag-o nga layi sang China kun sa diin ginahatagan sang gahum ang ila coast guard nga gub-on ang tanan nga estruktura nga ginpatindog sa Chinese-claimed reef kag mahimo man sila makasakay sa sakayang-pandagat kag mag-inspeksyon kun may mag-agi sa ila ginasakupan nga teritoryo sa kalalawran.
Wala nakahibalo si Tolentino kun ano ang direkta nga epekto sini nga layi kag wala man siya nakahibalo sang solusyon.
Apang posible suno sa iya nga paagi sa diplomatic front kaangay sang Association of Southeast Asian Nations ukon Biden presidency sa US ukon direkta nga dayalogo sa China, mahimo nga masolusyunan ang problema nga dala sang bag-o nga layi sang China.
