Gintalana si Ely Estante bilang bag-o nga executive assistant para sa market kag animal protection sa siyudad sang Iloilo.
Sa isa ka exclusibo nga interview sang Bombo Radyo, ginpahayag ni Estante nga nagapasalamat siya sa oportunidad nga ginhatag sa iya, kag handa siya magbulig sa siyudad paagi sa mga programa nga nagapabakod sang animal welfare kag merkado nga operasyon.
Ginpanugyan niya nga kinahanglan ang pondo para sa mga sapat, ilabi na sa mga programa nga nagatuyo magpabakuna kag magkapon sang mga sapat agud malikawan ang paglapta sang rabies.
Ginalantaw man niya ang posibilidad nga magamit ang mga sobra nga pagkaon halin sa mga restaurants kag merkado bilang bulig sa mga stray animals.
Ginpakita man ni Estante ang interes nga magpatukod sang opisina nga magatutok gid sa animal protection agud mas epektibo ang pagpatuman sang mga plano.
Ginlantaw man niya ang kahimtangan sang slaughter house sa siyudad kag ginplano nga usisahon ang sistema para masiguro ang humane treatment sang mga sapat kag kalimpyo sang pasilidad.
Sa subong, nagapadayon ang iya koordinasyon sa mga ahensya kag stakeholders para sa mas lapad nga implementasyon sang iya mga advocacy.
