Target ni President Ferdinand Marcos Jr. nga mahimo nga “alternatibo” na lamang para sa mga Pilipino ang pag-trabaho sa luwas sang pungsod.
Mahimo ini paagi sa paghatag sang dugang nga trabaho diri mismo sa Pilipinas nga rason kun ngaa indi na mapilitan ang mga Pinoy nga magkadto sa iban nga mga nasyon agud makakita sang daku nga income.
Sa iya speech sa OFW Family Day 2023 sa Pasay City, ginpahayag ni Marcos nga nagalaum siya nga malab-ot ini nga target sa idalom sang iya governance brand nga “Bagong Pilipinas”.
“Sa Bagong Pilipinas, nais natin na ito’y maging alternatibo na lamang dahil mas marami ang pagkakataon sa loob ng bansa,” pahayag ni Marcos, Disyembre 20.
Sandig sa latest data sang Philippine Statistics Authority (PSA), nagnubo na lamang sa 4.2% ang jobless rate sa pungsod nga katumbas sang 2.09 million nga mga indibidwal nga wala sang trabaho.
Sa amo man nga speech, ginpasalamatan sang presidente ang sakripisyo sang mga overseas Filipino workers (OFWs) kag ang ila nga kontribusyon sa ekonomiya sang pungsod.
Pila sa mga programa sang gobyerno para sa OFWs amo ang One Repatriation Command Center nga isa ka 24/7 hotline para sa mga Pinoy sa guwa sang pungsod nga nagakinahanglan sang rescue, repatriation, counseling, kag legal assistance.
May yara man sang training programs kaangay sang Livelihood Development Assistance Program, Balik Pinay, Balik Hanapbuhay, Financial Awareness Seminar, kag Small Business Management Training and Enterprise Development Loan Program nga mahimo magamit sang OFWs kun magbalik sila sa trabaho ukon magpauli diri sa Pilipinas.#
