ILOILO CITY – Nagdangat sa P275 million ang balor sang bulig nga ginhatag sang gobyerno para sa mga biktima sang kalamidad nga dala sang nag-agi nga bagyo sa Pilipinas.
Suno kay Chris Mathay, director sang Department of Social Welfare and Development Disaster Response and Management Bureau, ang bulig ang nagikan sa resources sang ahensya, local government units, kag non-government organizations.
Ini ang gingamit sa pagbulig sa 3.2 million nga mga indibidwal nga apektado sang gintingub nga epekto sang southwest monsoon, kag mga bagyo nga Egay kag Falcon.
Kabug-usan nga 868,000 nga mga pamilya nagikan sa 5,000 nga mga barangay sa 12 ka mga rehiyon ang gin-igo sang malain nga tyempo sang nagliligad nga mga semana.
Suno sa iya, ang gobyerno ang may nabilin nga 1.8-billion nga balor sang stockpile items, kag P2.2-billion nga balor sang standby kag quick response funds.
Samtang, ang death toll bangud sa pagbubo sang mabaskog nga ulan nga dala sang southwest monsoon ukon habagat nga ginpabaskog pa sang Egay ang nagsaka pa sa 29 suno sa National Disaster Risk Reduction and Management Council.
