Antes mo pakaslan ang isa ka tawo, daw ano mo ayhan ini kakilala?
Ini nga istorya ang magahatag sa leksyon sa aton nga indi magpahinali kundi dapat nga mangin mahinalungon gid sa pagpili sang tawo nga higugmaon.
Sa Indonesia, may 26-anyos nga lalaki nga sobra-sobra gid ang paghigugma sa babaye nga bag-o lang sini nakilala.
Nagkilalahay sila paagi lamang sa internet, kag sa una nila nga pagkitaay, baw, na-love-at-first-sight gid dayon ang lalaki sa babaye!
Masami nga may takop nga belo ang nawong sang babaye, kag ginpinsar sang lalaki nga basi mahuyaon lang ini. Bangud gusto gid niya ang babaye, ginpadayon nila ang pag-date kag sang ulihi, ginhagad nga magpakasal.
Nagsugot ang babaye apang naghingyo nga indi lang pag-iparehistro ang kasal bangud nga bag-o lang napatay ang iya iloy kag madugay naman nga nangindulaan ang iya amay gani nga wala man ini sang imbitaron.
Abril 12, 2024 sang nagsugtanay sila sa secret marriage sa atubang sang isa ka religious leader sa Wangunjaya Village kun sa diin nagaistar ang lalaki.
Apang bisan kasado na ang duha, wala pa gihapon ginakakas sang babaye ang belo, wala man ini naga-istorya sa iban nga paryente sang iya bana, kag labi sa tanan, wala sila sang honeymoon!
Isa ka semana ang nagligad pagkatapos sang kasal, indi na makaagwanta ang lalaki gani nagpangayo sang bulig sa mga paryente.
Eksakto 12 ka adlaw matapos ang ila kasal sang nadiskubrehan sini nga ang iya bride, indi gali matahum nga babaye, kundi isa man ka lalaki!
Nakit-an man nila ang tatay sini nga amo naman ang nag-sorry sa nahimo sang iya anak.
Sa bulig sang mga pulis, napaako ang bride sa iya nga sala, kag nagdepensa man ini nga nahimo lamang niya ini para sa kuwarta.
Nagapangatubang subong ang bride sang kaso nga paglapas sa Article 378 sang Criminal Code sang Indonesia kag posible mapreso sa sulod sang apat ka tuig.
Nagpahanumdom naman ang Religious Affairs Office nga malikawan ini nga mga insidente kun ginahikot sang bride kag groom nga opisyal nga ipa-rehistro ang ila nga kasal.
