Wala gihapon nakilal-an ang bangkay sang isa ka babaye nga nakit-an sa mga bakhawan sa Brgy. Tanag, Buenavista, Guimaras.
Sa interview sang Bombo Radyo kay PCapt. Rene Mercado, hepe sang Buenavista Municipal Police Station, iya ginpahayag nga indi pamilyar sa mga residente sa lugar ang babaye.
Suno ka Mercado, may yara sang mga pilas kag gasgas ang lawas sang babaye apang indi ini tuga sang pagkabuno ukon pagkatiro.
Ginabanta nga pila ka adlaw na nga yara sa tubig ang lawas sang biktima nga ginabanta 30+ ang edad, nagataas sang 5’3″ kag tubtob sa abaga ang buhok.
Nagpanawagan naman ang hepe sa publiko nga magpakig-angot sa pulis kun may nadula sila nga himata.
Padayon subong ang pagpakig-angot sang Buenavista Municipal Police Station sa kaiping nga mga barangay para madasig ang makilala ang babaye.
