ILOILO CITY – Ginpasakaan sang kaso sang Criminal Investigation and Detection Group (CIDG) ang duha ka mga barangay officials sa Jalandoni Estate, Lapuz, Iloilo City bangud sa anomaliya sa pagpanagtag sang Social Amelioration Program.
Ang mga opisyales nga ginpasakaan sang kaso amo sanday Punong Barangay Efren Gimeo kag Barangay Secretary Keesha Segovia.
Sa interview sang Bombo Radyo kay PCol. Gervacio Balmaceda, pinuno sang Criminal Investigation and Detection Group (CIDG) Region 6, iya ginpahayag nga kaso nga graft ang paga-atubangon nanday Gimeo kag Segovia.
Suno kay Balmaceda, nakumpirma sang ahensya nga may mga benepisyaryo sang Social Amelioration Program nga indi residente sang nasambit nga barangay apang nakabaton sang P6,000 nga ayuda.
Pahayag niya, gingamit sang mga opisyal ang ila posisyon agud nga i-manipula ang listahan sang mga benepisyaryo sang Social Amelioration Program.
Dugang pa sang natungdan, magluwas sa kaso nga graft, magapangatubang man sang kaso administratibo ang punong barangay kag sekretarya bangud sa paglapas sa Republic Act 6713 o Code of Ethical Standard and Public Official.
