May ginauyatan na nga citation tickets ang mga barangay officials sa syudad matapos sila gin-deputize sang Iloilo City Government agud makadakop kag makapanaway sang mga residente nga wala nagasunod sa mga minimum health protocols.
Sa interview sang Bombo Radyo kay Calumpang, Molo Punong Barangay Roberto Niño, tagpamaba sang Liga ng mga Barangay, iya ginpahayag nga madugay naman ini nga hingyo sang mga opisyal sang barangay gani gina-welcome nila ang bag-o nga obligasyon.
Ginakabig man ini nga collective effort bangud updanay ang mga opisyal agud ma-monitor ang mga residente kag malikawan ang transmission sang COVID-19.
Suno kay Niño, sila ang gintudluan man kun paano i-fill in ang citation tickets kag kun paano ini i-isyu sa mga violators.
Nahibaluan nga base sa record sang compliance team umpisa sang ginpatuman ang pagpanakop, nagapanguna ang Bolilao, Mandurriao nga may pinakadamo nga violators nga naglab-ot sa 38.
Yari ang nagasunod nga mga barangay kag ang nadakpan nga nagalapas sa minimum health protocols:
San Juan, Molo – 36
Sooc, Arevalo – 22
Pala-pala Zone 2, Iloilo City Proper – 14
San Isidro, Jaro – 14
Simon Ledesma, Jaro – 14
Barrio Obrero, Lapuz – 14
San Isidro, La Paz – 9
Una diri, ginkumpirma man ni Mr. Jeck Conlu, COVID-19 team spokesperson sang syudad, nga wala sang holiday kag weekend break ang compliance team sang syudad agud masaway ang mga tawo ilabi na sa naka-lockdown nga mga lugar kun sa diin may narekord nga kaso sang COVID-19.
Sa subong, ginalauman nga sa bulig sang mga opisyal sang barangay, dugang nga mga pumuluyo ang madisiplina.
