Nagapanguna ang Barangay Tabuc Suba sa may pinakamataas nga kaso sang COVID-19 sa distrito sang Jaro,Iloilo City.
Sa interview sang Bombo Radyo kay Punong Barangay Joel Jabonillo, iya ginpahayag nga apat ang ila nga active cases.
Lunsay na naka-quarantine ang mga nagpositibo suno kay Jabonillo kag tigulang na ang kalabanan sa ila.
Sa ginpatigayon nga contact tracing, natukiban nga pito ang naka-close contact sang mga pasyente.
Sila ang napaidalom na sa swab test kag ginahulat na lang subong ang resulta.
Samtang sa bahin naman sang pagpatuman sang curfew sa mga menor de edad, nagpahanumdom si Jabonillo sa mga ginikanan nga indi na pagpagwaon ang ila mga bata umpisa 8:00 pm tubtob 4:00 sa kaagahon.
Suno kay Jabonillo, regular man ang pagpatrol sang mga barangay tanod agud masiguro nga wala na sang nagalihu-liho kun magpatak ang curfew hours.
