Nagpanawagan si former Bayan Muna Party-list Rep. Atty. Neri Colmenares sa iban pa nga mga pamilya sang drug war victims sa Iloilo kag sa bilog nga Panay nga magpa-rehistro man agud nga maka-partisipar sa trial sang International Criminal Court (ICC) batok kay former President Rodrigo Duterte.
Matapos ginkumpirma ang tanan nga charges nga crimes against humanity batok sa anay presidente, natalana nga buksan liwat sang ICC Registry ang proseso para sa drug war victim participation.
Lain pa gid ini sa 539 victims nga gin-authorize na sang international tribunal nga mag-intra sa proceedings. Ang participants amo ang family members sang mga napatay sa Duterte anti-drug campaign.
Sa interview sang Bombo Radyo sa Ilonggo human rights lawyer, iya ginpahayag nga oportunidad ini sa pamilya nga ipakigbato ang hustisya para sa ila nga mga himata nga “ginpatay kaangay sang ido.”
Nagpanugyan si Colmenares nga mahimo magdirekta sa pagpa-rehistro sa ICC website, ukon magpakig-angot sa ila ukon sa Rise Up for Life and for Rights (Rise Up).
Ang Rise Up amo ang network sang mga pamilya kag advocates sang mga biktima sang extrajudicial killings (EJKs) nga yara sa idalom sang National Council of Churches in the Philippines (NCCP).
Kahapon sang gin-anunsyo sang Pre-Trial Chamber I nga unanimous ang desisyon sang judges nga i-confirm ang tanan nga kaso nga crimes against humanity batok kay Duterte kasunod sang hearing sang nagligad nga Pebrero kun sa diin nag-presentar ang prosekusyon, ang defense, kag ang mga abogado sang drug war victims.
Sa Article 63 sang Rome Statute, required ang akusado nga tawo nga magtambong kadungan sang trial.
Matandaan nga wala nagtambong si Duterte sa confirmation of charges hearing sang Pebrero. Sang Abril 22, wala man ini nagsipot sang ginbasa ang desisyon sang Appeals Chamber sa iya apelar kaangot sa hurisdiksyon sang ICC sa iya kaso.#
